युनिफॉर्म नसले तरी तुम्ही देखिल पोलिसच आहात; पोलीस अधिकारी नीता पाडवी

बोईसर (वार्ताहर) : युनिफॉर्म नसले तरी तुम्ही देखिल एक प्रकारे पोलिसच आहात. अपुऱ्या पोलीस बळामुळे तुम्हालाच गणेशोत्सव साजरा करतांना दक्षता घ्यावयाची आहे. तसेच यंदाचा गणेशोत्सव निर्बंधमुक्त साजरा होत असला तरीही गणेशोत्सव मंडळांचे पदाधिकारी आणि कार्यकर्त्यांनी स्वयंनियमनासह कायदा सुव्यवस्था अबाधीत राखण्यासाठी प्रयत्न करावेत, असे आवाहन पालघरच्या उपविभागीय पोलीस अधिकारी नीता पाडवी यांनी व्यक्त केले.

महामार्गावरील सायलेंट हॉटेलमध्ये शनिवारी मनोर पोलीस ठाण्याच्या वतीने आयोजित गणेशोत्सव मंडळाचे पदाधिकारी आणि कार्यकर्त्यांना आगामी गणेशोत्सवा संदर्भात मार्गदर्शक सूचनांची माहिती देण्यासाठी आयोजित केलेल्या बैठकीत त्या बोलत होत्या. गेल्या दोन वर्षांच्या काळात आपली अदृश्य आजारा सोबत आपली लढाई सुरू होती. त्यामुळे गणेशोत्सव साजरा करण्यासाठी शासनाच्या वतीने अनेक निर्बंध लादण्यात आले होते.

भावपूर्ण वातावरणात कोणताही अनूचित प्रकार न होता सण साजरा होईल, याची दक्षता घेण्याचे आवाहन पालघर उपविभागीय पोलीस अधिकारी नीता पाडवी यांनी केले. सामाजिक आरोग्य राखण्यासाठी विसर्जन मिरवणुकीत डीजेचा वापर टाळावा आणि आवाज कमी ठेवावा, मिरवणुकीत लेझीम आणि ढोल पथक सारखी पारंपरिक वाद्ये वाजवावी, मंडळांची नोंदणी करावी अन्यथा मंडळांच्या पदाधिकाऱ्यांना कलम १४९ नुसार नोटीस देण्यात येईल.

विसर्जन स्थळी काळजी घ्यावी, स्थानिक प्रशासनाने विसर्जन स्थळी लाइफ गार्ड ठेवण्यासाठी प्रयत्न करावे. मनोर पोलीस ठाण्याच्या कार्यक्षेत्रात ७५ गावे ६९ पोलीस अधिकारी आणि कर्मचारी उपलब्ध असल्याने कामात मर्यादा पडत आहेत. त्यामुळे प्रत्येक दक्ष नागरिक स्वतः ला पोलीस समजूनच शिस्त पाळावी आणि पोलिसांना सहकार्य करण्याचे आवाहन यावेळी पडवी यांनी केले.

कोरोना विषाणूचा प्रादुर्भाव घटल्याने राज्य सरकारच्या वतीने गणेशोत्सवा वरील निर्बंध हटवण्यात आले आहेत. गणेशोत्सवाच्या पार्श्वभूमीवर राज्य सरकारच्या वतीने मार्गदर्शक सूचना जाहीर केलेल्या सूचनांची माहिती गणेशोत्सव मंडळांचे पदाधिकारी आणि कार्यकर्त्यांना यावेळी देण्यात आल्या. व्यापारी आणि दुकानदारांकडून जबरदस्तीने वर्गणी गोळा करणाऱ्यांवर कारवाईचा इशारा पोलिसांकडून देण्यात आला आहे. यावेळी जिल्हा परिषदेच्या कृषी सभापती प्रतिभा गुरोडा, मनोर पोलीस ठाण्याचे पोलीस निरीक्षक प्रदीप कसबे, मनोर पोलीस ठाण्याचे अधिकारी, कर्मचारी, गणेशोत्सव मंडळाचे पदाधिकारी, महिला दक्षता समिती सदस्य, प्रतिष्ठित नागरिक आणि राजकीय पक्षांचे पदाधिकारी उपस्थित होते.

दरम्यान उपस्थित पोलीस पाटील, तंटामुक्त अध्यक्ष, राजकीय नेते, व्यापारी, नागरिकांच्या समस्या व सूचनांना कसबे यांनी ऐकून घेतले. मनोर पोलीस ठाण्याच्या हद्दीतील रस्त्यांवरील खड्डे बुजवण्यासाठी पत्रव्यवहार केला जाणार आहे. विसर्जन मिरवणुकांसाठी मनोर शहरातील वाहतून नियमन केले जाणार आहे. मनोर बाजारपेठेतील रस्त्यालगतच्या गटारांवर थाटलेली दुकाने आणि फेरीवाले ग्रामपंचायत प्रशासनाला सोबत घेऊन कारवाई करून हटवले जातील, वाहतूक कोंडी रोखण्यासाठी प्रवासी रिक्षांचे नियमन केले जाणार असल्याचे कसबे यांनी सांगितले.