बिजिंग : अमेरिकन संसदेच्या अध्यक्ष नॅन्सी पेलोसी यांच्या तैवान दौऱ्यामुळे चीन आणि अमेरिका पुन्हा नव्याने आमनेसामने आले असून त्यांच्यातील वाद आता टोकाला गेला आहे. नॅन्सी पेलोसी तैवान मधून दक्षिण कोरियाकडे रवाना झाल्यानंतर चीनने तैवानला चोहोबाजूने घेरण्याचा प्रयत्न केला असून तैवानच्या चारही बाजूंनी नो एन्ट्री झोन घोषित केला आहे. त्याचबरोबर जलमार्ग आणि हवाईमार्गांना बंदी घातल्यामुळे आता नवा पेच निर्माण झाला आहे.
तत्पूर्वी, नॅन्सी पेलोसी यांनी तैवानच्या संसदेला संबोधित केले. यादरम्यान त्यांनी राष्ट्राध्यक्ष त्साई इंग-वेन यांचीही भेट घेतली. दुसरीकडे, चीनच्या पीपल्स लिबरेशन आर्मीने गुरुवार ते रविवार या कालावधीत तैवानच्या आसपासच्या सहा भागांत लष्करी सराव करण्याचे सांगितले होते. प्रत्यक्षात चीनने तैवानला चारही बाजूंनी घेरले आहे.
दरम्यान, पेलोसी म्हणाल्या, सुरक्षेच्या मुद्द्यावर अमेरिका तैवानला पाठिंबा देईल. आम्ही प्रत्येक क्षणी त्यांच्यासोबत आहोत. तैवानच्या मैत्रीचा आम्हाला अभिमान आहे. तैवानच्या पाठीशी उभे राहण्याचे ४३ वर्षांपूर्वी अमेरिकेने दिलेले वचन आजही ते पूर्ण करत असल्याचे त्या म्हणाल्या.
पेलोसी यांना ऑर्डर ऑफ प्रोपियस क्लाउड्स विथ स्पेशल ग्रँड कॉर्डन, तैवानचा सर्वोच्च नागरी सन्मान प्रदान करण्यात आला. पेलोसी म्हणाल्या, अमेरिका तैवानची बाजू सोडणार नाही. आमच्या काँग्रेसच्या शिष्टमंडळाची तैवानला भेट या देशाच्या चैतन्यशील लोकशाहीला पाठिंबा देण्याच्या अमेरिकेच्या वचनबद्धतेचा सन्मान करते.
