Wednesday, July 17, 2024
Homeताज्या घडामोडीमान्सूनपूर्व पावसाचे रौद्ररुप; जनजीवन विस्कळीत

मान्सूनपूर्व पावसाचे रौद्ररुप; जनजीवन विस्कळीत

सांगली : सांगली जिल्ह्यासह जत तालुक्यातल्या दुष्काळी भागातही मान्सूनपूर्व पाऊस तुफान पडला आहे. त्यामुळे काही ठिकाणी पूल पाण्याखाली गेले. तर ओढे-नाले तुडूंब भरून वाहत आहेत.

जत तालुक्यात गेल्या बारा तासापासून मान्सूनपूर्व धुवाँधार असा पाऊस सुरू आहे. पूर्व भागात पावसाची संततधारही अद्याप कायम आहे. गेल्या अनेक वर्षातील हा सर्वात मोठा मान्सूनपूर्व पाऊस असल्याचे सांगण्यात येत आहे. गुरुवारी दुपारी सुरू झालेला पाऊस अजूनही सुरूच आहे. पावसाच्या मध्यम ते हलक्या सरी सतत बरसत आहेत.

तालुक्यात सर्वत्र हा पाऊस सुरूच असून बहुतांशी ओढे, नाले तुडूंब भरून वाहत आहेत. त्यामुळे वळसंग ते सोर्डी रस्ता पुलावरून पाणी वाहत असल्याने बंद झाला आहे. तसेच उमराणी, बिळुर, मुचुंडी, शेगाव, वाळेखिंडी, जत शहर आदी भागात जोरदार पाऊस झाला आहे. पावसाने मोठा दिलासा दिला असला तरी काही पिकांचेही मोठ्या प्रमाणात नुकसान झाले आहे.

तसेच महाराष्ट्र, कर्नाटक, आंध्रमधील लाखो भाविकांचे श्रद्धास्थान असलेले तीर्थक्षेत्र गुड्डापुर येथील मंदिर आवारात मोठ्या प्रमाणात पाणी घुसले आहे. या मंदिराच्या प्रदक्षिणा मार्गावर गुढघाभर पाणी साचले असून दर्शनासाठी आलेल्या भाविकांना पाण्यातून प्रदक्षिणा करावी लागत आहे. तीर्थक्षेत्र गुड्डापुर जलमय होण्याची ही पहिलीच वेळ आहे.

Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra

RELATED ARTICLES
- Advertisment -

Most Popular

- Advertisment -