Monday, July 15, 2024
Homeमहाराष्ट्रपालघरकृषीभूषण पुरस्कारावर शेतक-यांची नाराजी

कृषीभूषण पुरस्कारावर शेतक-यांची नाराजी

अनेकांनी व्यक्त केल्या तीव्र प्रतिक्रिया

वाडा (प्रतिनिधी) : तालुक्यातील गालतरे येथील गोवर्धन इको व्हिलेजचे प्रमुख सनतकुमार प्रभुजी यांना यंदाचा राज्यस्तरीय कृषीभूषण पुरस्कार काल नाशिक येथे झालेल्या एका समारंभात राज्यपाल भगतसिंह कोश्यारी यांच्या हस्ते व राज्याचे कृषी मंत्री दादा भुसे, उपमुख्यमंत्री अजित पवार व अन्न व पुरवठा मंत्री छगन भुजबळ यांच्या प्रमुख उपस्थितीत प्रदान करण्यात आला. मात्र या पुरस्कारावर अनेक शेतक-यांनी नाराजी व्यक्त केली असून निषेध नोंदवला आहे.

महाराष्ट्र राज्य सरकारच्यावतीने दरवर्षी कृषीक्षेत्रात उल्लेखनीय कामगिरी करणा-या शेतक-यांना कृषी भूषण पुरस्कार देऊन गौरवण्यात येते. यावर्षीचा कृषीभूषण पुरस्कार वाडा तालुक्यातील गालतरे येथील गोवर्धन इको व्हिलेजचे प्रमुख सनतकुमार प्रभुजी यांना देण्यात आल्याने अनेक शेतक-यांनी यावर नाराजी व्यक्त केली.

कृषीभूषण या पुरस्काराचा खरा हक्कदार सर्वसामान्य शेतकरीच असायला हवा. धर्मदाय संस्थेला कृषीभूषण पुरस्कार देणे संयुक्तिक वाटत नाही. तुटपुंज्या साधनांसह व कमी गुंतवणुकीत शेतीमध्ये काबाडकष्ट करून वेगवेगळे प्रयोग करणारा शेतकरीच खरा कृषीभूषण असू शकतो, अशा प्रतिक्रिया शेतक-यांमधून उमटू लागल्या आहेत.

अलीकडेच राजेंद्र पवार यांनी कृषीरत्न पंजाबराव देशमुख पुरस्कार राज्यपाल भगतसिंह कोश्यारी यांच्या हस्ते स्विकारण्यास नकार दिला होता. त्यातच आता दुसरा महत्वाचा पुरस्कार एका संस्थेला दिल्याने शेतक-यांनी नाराजी व्यक्त केली आहे.

जिल्ह्यातील शेतक-याला कृषिमंत्र्यांनी शेतीवर संशोधन करणा-या, शेतीत नवनवीन प्रयोग करणा-या शेतक-याला पुरस्कार द्यायला हवा होता. मात्र एखादा संस्थेला हा पुरस्कार दिल्याने तो आम्हाला मान्य नसून आम्ही त्याचा निषेध करतो. -बी.बी.ठाकरे ओबीसी नेते.

शेतीमध्ये नवनवीन प्रयोग करणा-या एखाद्या प्रगतशील शेतक-याला सदरचा पुरस्कार दिला पाहिजे होता. असा पुरस्कार दिल्याने त्याला काही अर्थ राहिला नाही. -प्रफुल्ल पाटील, युवा शेतकरी.

Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra

RELATED ARTICLES
- Advertisment -

Most Popular

- Advertisment -