मुंबई : शिवसेना नेते संजय राऊत यांच्यानंतर आता राष्ट्रवादी नेते आणि मंत्री नवाब मलिकांचीही संपत्ती ईडीकडून जप्त करण्यात आली आहे. मनी लॉन्ड्रिंग प्रकरणी ईडीने मलिकांची कुर्ला पश्चिम येथील गोवावाला कंपाऊंड, उस्मानाबाद येथील १५० एकर जमीन, कुर्ला पश्चिमेतील ३ फ्लॅट आणि वांद्रे येथील २ सदनिका अशा एकूण ८ मालमत्ता जप्त करण्याची कारवाई केली आहे.
अलीकडेच मुंबईतील विशेष पीएमएलए कोर्टाने मलिक यांच्या न्यायालयीन कोठडीत १८ एप्रिलपर्यंत वाढ केली आहे. ईडीने प्रथम २३ फेब्रुवारीला मलिक यांच्यावर अटकेची कारवाई केली आहे. यामध्ये त्यांना २१ मार्चपर्यंत न्यायालयीन कोठडी सुनावत त्यांची रवानगी आर्थर रोड कारागृहात करण्यात आली होती. त्यानंतर मलिकांच्या कोठडीत ४ एप्रिलपर्यंत वाढ करण्यात आली होती. उच्च रक्तदाब व मधुमेह असल्याने कमी मीठ असलेले घरचे जेवण मिळावे, अशा विनंतीचाही अर्ज करण्यात आला होता. त्यावर मलिक यांचा वैद्यकीय अहवाल पाहून त्यांना औषधं आणि घरगुती जेवण घेण्यास परवानगी देण्यात आली आहे.