राज्याचे मंत्री नबाब मलिकांना ईडीकडून अटक

मुंबई : राज्याचे अल्पसंख्याक मंत्री व राष्ट्रवादी काँग्रेसचे प्रवक्ते नवाब मलिक हे आता अंमलबजावणी संचालनालयाच्या (ईडी) रडारवर आले आहेत. नवाब मलिकांना चौकशीसाठी ईडीच्या कार्यालयात नेण्यात आले होते. अखेर आठ तासांच्या चौकशीनंतर नवाब मलिक यांना ईडीने अटक केली आहे.

नवाब मलिकांची ईडीकडून ८ तास चौकशी

आज पहाटे ईडीचे पथक नवाब मलिक यांच्या घरी धडकले होते. त्यानंतर सकाळी सात वाजल्यापासून नवाब मलिक यांची ईडी कार्यालयात अधिकाऱ्यांकडून चौकशी सुरू होती.

ईडी अधिकारी बुधवारी पहाटे सीआरपीएफच्या जवानांना घेऊन नवाब मलिक यांच्या कुर्ला येथील नूर मंजील या निवासस्थानी दाखल झाले. त्यानंतर ईडीने कोणतेही समन्स न देता नवाब मलिक यांना चौकशीसाठी घेऊन गेले.

कुख्यात गँगस्टर दाऊद इब्राहीमचा भाऊ इक्बाल कासकरने जुन्या मालमत्ता व्यवहार प्रकरणी चौकशीत दिलेल्या माहितीच्या आधारे मंत्री नवाब मलिक यांची अंमलबजावणी संचालनालय (ईडी)कडून चौकशी केली जात असल्याची माहिती समोर आली आहे.