नवी दिल्ली : पंजाब विधानसभा निवडणुकीसाठी आगामी १४ फेब्रुवारी रोजी होणारे मतदान पुढे ढकलण्याचा निर्णय निवडणूक आयोगाने घेतला आहे. विविध राजकीय पक्षांकडून होणारी मागणी पाहता पंजाबमध्ये आता २० फेब्रुवारी रोजी मतदान होणार असून मतमोजणी १० मार्च रोजी केली जाणार आहे.
पंजाबमध्ये आगामी १४ फेब्रुवारीला होणारी निवडणूक पुढे ढकलण्यासाठी सर्वच राजकीय पक्षांनी निवडणूक आयोगाकडे धाव घेतली होती. मुख्यमंत्री चन्नी, भाजप आणि बसपा यांनी निवडणूक आयोगाला या संदर्भात पत्र लिहिले आहे.
निवडणूक पुढे ढकलण्याबाबत लिहिलेल्या या पत्रात म्हटले आहे की, १६ फेब्रुवारीला संत रविदास जयंती आहे. पंजाबमध्ये लाखो भाविक त्यांची पूजा करण्यासाठी वाराणसीला जातील. अशा स्थितीत ते मतदान करू शकणार नाहीत. त्यामुळे निवडणुकीची तारीख बदलण्यात यावी. अशी मागणी मुख्यमंत्री चरणजीत चन्नी यांनी पत्राद्वारे केली होती. त्यानंतर निवडणूक आयोगाने बैठक घेऊन हा निर्णय जाहीर केला आहे. त्यानुसार १४ फेब्रुवारीला होणाऱ्या निवडणुका २० फेब्रुवारीला पार पडणार आहेत. आणि मतमोजणी ठरल्याप्रमाणे १० मार्चला होईल असे आयोगाने स्पष्ट केले आहे.