नवी मुंबई : नेत्र हे मानवी शरीरातील खूप महत्वाचे अवयव आहेत. त्यात जर काही विकार झाला, तर त्याची झळ स्वतःवर तर होतेच, पण आयुष्यावरही विपरीत परिणाम होतो. असे होऊ नये हा मुख्य उद्देश डोळ्यासमोर ठेवून घणसोली येथील यंग नेत्र रोग तज्ज्ञ डॉ. प्रशांत थोरात मागील दहा वर्षांपासून नवी मुंबईतील विविध नाक्यावर जाऊन नाका कामगारांची विनामूल्य डोळे तपासणी करत आहेत.
त्यामुळे अनेकांच्या आयुष्यातील अंधार दूर केला आहे. तसेच इतरही काही आजार असतील, तर त्याबाबतही मार्गदर्शन करत आहेत. आजतागायत त्यांनी हजारो रुग्ण विनामूल्य तपासून चष्मे देखील वाटप केले आहेत.
डॉ. प्रशांत थोरात यांनी तीन वर्षांपूर्वी एक वाहन खरेदी केले. या वाहनाला प्रकाश रथ नाव दिले. या प्रकाश रथात नेत्र तपासणी संदर्भातील सर्व सामुग्री उपलब्ध आहे.
नवी मुंबईत एकूण दहा कामगार नाके आहेत. या नाक्यांवर अस्थिर मजूर, सुतार, गोवंडी असे कामगार पोटासाठी काम मिळेल म्हणून येत असतात. त्यांची आर्थिक स्थिती फारच नाजूक असल्याने डोळ्यांच्या समस्या असल्या तरी ते काम करत असतात. आजतागायत एकूण दहा हजार नाका कामगारांची तपासणी करून चष्मे देखील विनामूल्य वाटप करण्यात आले आहेत.
गरजूना मदतीचा हात दिल्यानंतर आत्मिक समाधान मिळत असल्याचे, डॉ. प्रशांत थोरात, नेत्र रोग तज्ज्ञ यांनी सांगितले.
