नाशिक प्रभाग रचनेचा आराखडा फुटला

नाशिक : नाशिक महानगरपालिकेच्या होऊ घातलेल्या निवडणुकीसाठी तयार करण्यात आलेल्या प्रभाग रचनेचा आराखडा फुटला असल्याची जोरदार चर्चा नाशिक शहरातील राजकीय वर्तुळात सुरू आहे.

याबाबत मात्र महापालिका प्रशासनाने काहीही बोलण्यास नकार दिला असून त्यामुळे आराखडा फुटला की नाही, या विषयावर आता शहरांमध्ये चर्चा सुरू आहे. दोन महिन्यांवर येऊन ठेपलेल्या नाशिक महापालिका निवडणुकीची धामधूम सुरू होण्याआधीच प्रभाग रचना फुटल्याची चर्चा सुरू आहे. यामुळे खळबळ उडाली आहे. या धमाक्यामुळे विद्यमान नगरसेवक आणि इच्छुकांमध्ये अस्वस्थता पसरली आहे.

निवडक प्रस्थापितांनी सोयीच्या भागात दौरे सुरू केल्यामुळे या चर्चेला बळकटी प्राप्त झाली आहे. याच पार्श्वभूमीवर सातपूर येथील सामाजिक कार्यकर्ते प्रशांत दैतकार-पाटील यांनी महापालिका आयुक्त कैलास जाधव यांना पत्र देऊन न्यायालयात जाण्याचा इशारा दिला आहे.

नवीन वर्षात फेब्रुवारीमध्ये होऊ घातलेल्या नाशिक महापालिका निवडणुकीसाठी भाजप, शिवसेना, मनस, काँग्रेसे आणि राष्ट्रवादी काँग्रेस या पक्षांनी कंबर कसली आहे. या पक्षांच्या नेत्यांचे शहरात दौऱ्यावर दौरे सुरू असताना आता महापालिकेची प्रभागरचना फुटल्याचा दावा होत असल्याने एकच खळबळ उडाली आहे.