दुबई (वृत्तसंस्था) : मॅक्सवेलने डीआरएस घेण्यास मनाई केल्याने अंपायर्सनी बाद दिल्यानंतर डेव्हिड वॉर्नर मैदानाबाहेर पडला, असे ऑस्ट्रेलियाच्या मॅथ्यू वॅडेने म्हटले आहे.
वॉर्नरने डीआरएस का घेतला नाही यावर, हो, आम्हाला याबद्दल जास्त बोलायला वेळ मिळाला नाही. फक्त एक दोन गोष्टी घडल्या, मला वाटते की काहीतरी आवाज आला, वॉर्नरलाच खात्री नव्हती की तो नेमका कसला आवाज आहे. चेंडू बॅटला लागला असे त्याला वाटत नव्हते, पण नॉन-स्ट्रायकर एंडवर मॅक्सवेलला काही आवाज ऐकू आला. अशा परिस्थितीत हे समजणे फार कठीण आहे. मॅक्सवेलने वॉर्नरला डीआरएस घेण्यास मनाई केली. नंतर अल्ट्राएजवर समजले की चेंडू बॅटला लागला नाही, असे वॅडेने या घटनेमागील रहस्य उलगडले आहे.
डेव्हिड वॉर्नर आणि मॅथ्यू वेड ऑस्ट्रेलियाच्या पाकिस्तानविरुद्धच्या विजयाचे हीरो ठरले. वॉर्नर हा ३० चेंडूंत ४९ धावांवर असताना शादाब खानच्या गोलंदाजीवर यष्ट्यांमागे झेलबाद झाला. हा चेंडू वॉर्नरच्या बॅटला लागला नसल्याचे रिप्लेमध्ये दिसून आले. पण तरीही वॉर्नर पॅव्हेलियनमध्ये परतला.
वॉर्नर बाद झाल्यानंतर ऑस्ट्रेलियाची पकड सैल होईल, असे वाटत असताना स्टॉइनिस आणि वॅडेने पाकिस्तानच्या तोंडातून विजयी घास हिरावून घेतला.