Thursday, July 18, 2024
Homeताज्या घडामोडीआश्रमशाळेच्या बांधकामात अफरातफर?

आश्रमशाळेच्या बांधकामात अफरातफर?

पालघर जिल्हा विद्यार्थी महाराष्ट्र नवनिर्माण सेनेचे उपोषण

जव्हार (वार्ताहर) : जव्हारसारख्या आदिवासी ग्रामीण भागामध्ये विद्यार्थ्यांना शिक्षित करून या भागाचा विकास होईल यासाठी राज्य शासनाच्या वतीने शिक्षणाचा दर्जा सुधारण्यासाठी एकात्मिक आदिवासी विकास प्रकल्प जव्हार कार्यलयाच्या माध्यमातून अनेक शासकीय आश्रम शाळांचे बांधकाम करण्यात आले आहे. या बांधकामामध्ये प्रचंड अनियमितता असतानाही ठेकेदाराला आदिवासी विकास विभाग आणि सार्वजनिक बांधकाम विभाग या अधिकारी वर्गाने संगनमताने चार कोटी रुपये इमारत बांधकाम पूर्ण होताच अदा केले आहे. ही बाब पालघर जिल्ह्यातील महाराष्ट्र नवनिर्माण सेनेचे विद्यार्थी संघटनेने उचलून धरत दोषींवर कारवाई करून गुन्हे दाखल करा आणि रक्कम वसुली करा, यासाठी एकात्मिक आदिवासी विकास प्रकल्प जव्हार कार्यालयासमोर महाराष्ट्र नवनिर्माण सेनेचे पालघर जिल्हा सर्व पदाधिकारी एकत्र येऊन लाक्षणिक उपोषणास सुरुवात केली आहे.

कोरोनापश्चात आता शाळा सुरू झाल्यानंतर शिक्षण देण्याच्या कामात शासकीय आश्रम शाळांमध्ये सुरुवात झाली आहे. प्रकल्पामध्ये वाडा तालुक्यातील गुहीर आश्रम शाळेत इमारत बांधकाम करण्याच्या नावाखाली चार कोटी रुपयांचा अवास्तव खर्च करूनही इमारत बांधकाम अद्यापपर्यंत पूर्ण न झाल्याने त्या ठिकाणची शिक्षणव्यवस्था पूर्णपणे कोलमडली आहे. ठोस उपाययोजना होऊन आदिवासींना शिक्षण मिळावे, हा उद्देश साध्य होण्यासाठी या प्रकरणात दोषींवर कारवाई झाल्याशिवाय आंदोलन मागे घेतले जाणार नसल्याचे मनसे सचिव सतीश जाधव यांनी सांगितले.

प्रकल्प अधिकारी आज करणार चर्चा

दरम्यान, उपोषणाच्या दुसऱ्या दिवशी प्रकल्प अधिकारी यांनी मनसेच्या शिष्टमंडळाला चर्चेसाठी पाचारण केले असून उद्या (शुक्रवारी) आदिवासी विकास प्रकल्प अधिकारी यांच्या कार्यालयात चर्चा केली जाणार आहे. याबाबत सार्वजनिक बांधकाम विभागाच्या अधिकाऱ्यांनी ऑनलाइन चर्चा करावी, अशी मागणी केली आहे.

याबाबत जे दोषी असतील त्यांच्यावर तातडीने कारवाई न केल्यास मनसे स्टाईल आंदोलन करण्यात येईल. – ज्ञानेश्वर पाटील, उपाध्यक्ष, मनविसे, पालघर जिल्हा

Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra

RELATED ARTICLES
- Advertisment -

Most Popular

- Advertisment -