नाशिकमध्ये ३, ४ व ५ डिसेंबरला अ.भा. मराठी साहित्य संमेलन

नाशिक (वार्ताहर) : लोकहितवादी मंडळ, नाशिक आयोजित अखिल भारतीय मराठी साहित्य महामंडळाचे ९४ वे अखिल भारतीय मराठी साहित्य संमेलन ‘कुसुमाग्रज नगरी’, भुजबळ नॉलेज सिटी, आडगाव नाशिक येथे दि. ३, ४ व ५ डिसेंबर रोजी होणार आहे. ९४ व्या साहित्य संमेलानाचे स्वागताध्यक्ष, राज्याचे अन्न, नागरी पुरवठा व ग्राहक संरक्षण मंत्री व नाशिक जिल्ह्याचे पालकमंत्री छगन भुजबळ यांनी सोमवारी याबाबतची माहिती दिली.

लोकहितवादी मंडळ, नाशिक आयोजित अखिल भारतीय मराठी साहित्य महामंडळाचे ९४ वे अखिल भारतीय मराठी साहित्य संमेलनाबाबत माहिती देण्यासाठी आज भुजबळ फार्म कार्यालय नाशिक येथे पत्रकार परिषदेचे आयोजन करण्यात आले होते. त्यावेळी स्वागताध्यक्ष छगन भुजबळ बोलत होते.

‘कोरोनाच्या दुसऱ्या लाटेमुळे नाशिक मध्ये होणारे साहित्य संमेलन स्थगित करण्यात आले होते. आता हळूहळू सर्वच व्यवहार सुरु करण्यास शासनाने मंजुरी दिल्याने साहजिकच नाशिकला होणारे ९४ वे साहित्य संमेलन कधी घेता येईल यावरही विचार सुरु होता. त्यानंतर एकूण परिस्थितीचा विचार करुन आणि संमेलनाध्यक्षांच्या सोयीचा विचार करता हे संमेलन नाशिक येथे ३, ४ व ५डिसेंबर २०२१ या काळात घेण्याचेठरले आहे, ’असे भुजबळयांनी सांगितले.