लुसान (वृत्तसंस्था) : रिओ ऑलिम्पिकदरम्यानच्या सामना निश्चितीच्या (फिक्सिंग) आरोपांसह वादात सापडलेल्या एआयबीए अर्थात आंतरराष्ट्रीय बॉक्सिंग असोसिएशनने बेलग्रेडमध्ये (सर्बिया) होणाऱ्या पुरुषांच्या जागतिक स्पर्धेद्वारे आंतरराष्ट्रीय बॉक्सिंगची नव्याने (पुनश्च हरिओम) सुरुवात करण्याचे ठरवले आहे.
या स्पर्धेंसह भविष्यातील स्पर्धांमध्ये ग्लोव्हजचे रंग बदलण्यासह विजेत्याला बक्षीस म्हणून बेल्ट दिला जाणार आहे. बॉक्सर्सच्या ग्लोव्हजचा रंग पांढरा असेल. यापूर्वी, लाल आणि निळ्या रंगातील ग्लोव्हज वापरले जात होते. त्यावर एआयबीएचा लोगो असेल. पांढरे ग्लोव्हज हे आमच्या नव्या सुरुवातीचे प्रतीक असेल. प्रत्येक स्पर्धेतील निकालात पारदर्शकता, असेल, अशी माहिती एआयबीएचे अध्यक्ष उमर क्रेमलेव्ह यांनी दिली आहे.
जागतिक स्पर्धा
२४ ऑक्टोबरपासून एआयबीएची जागतिक स्पर्धा २४ ऑक्टोबरपासून बेलग्रेडमध्ये खेळली जाणार आहेत. यात भारतासह १०० देशांचे ६००हून अधिक बॉक्सर सहभागी होणार आहेत. जागतिक स्पर्धेतील पदके ही संबंधित धातूंनी भरलेली असतील. त्या शिवाय, विजेत्यांसाठी २.६ दशलक्ष डॉलर इतके एकूण बक्षीस असेल.