दुबई (वृत्तसंस्था) : आयपीएल २०२१च्या प्ले-ऑफ फेरीला (बाद फेरी) रविवारपासून (१० ऑक्टोबर) सुरुवात होत आहे. त्यातील क्वॉलिफायर-१मध्ये पहिल्या आणि दुसऱ्या स्थानावरील अनुक्रमे दिल्ली कॅपिटल्स व चेन्नई सुपर किंग्ज आमनेसामने आहेत.
क्वॉलिफायर-१मधील लढतीतील विजेता थेट अंतिम फेरीत पोहोचेल. पराभूत संघ स्पर्धेतून बाद होत नाही. गुणतालिकेतील तिसऱ्या आणि चौथ्या क्रमांकावरील संघांतील विजेत्यांसोबत क्वॉलिफायर-२मध्ये (दुसरी उपांत्य लढत) त्यांना खेळण्याची संधी मिळते. थेट फायनल प्रवेशाची संधी असल्याने क्वॉलिफायर-१मध्ये खेळणारा प्रत्येक संघ कामगिरी उंचावण्यासाठी उत्सुक असतो. यंदाही त्यासाठी महेंद्रसिंग धोनी आणि रिषभ पंतच्या नेतृत्वाखालील संघांमध्ये तशी चुरस असेल.
दिल्लीने १४ सामन्यांत १० सामने जिंकून २० गुणांनिशी पॉइंट्स टेबलमध्ये अव्वल स्थान पटकावले आहे. कॅपिटल्सनी उर्वरित हंगामातील सहा सामन्यांपैकी ४ सामने जिंकत बऱ्यापैकी फॉर्म राखला आहे. शेवटच्या सामन्यांत बंगळूरु रॉयल चॅलेंजर्सकडून मात खावी लागली असली तरी दिल्लीने पहिले स्थान कायम राखले. चेन्नईला १४ सामन्यांत ९ सामने जिंकता आलेत. युएई हंगामातील सलग चार सामने जिंकणारे धोनी आणि सहकारी अव्वल स्थानी कायम राहतील, असे वाटले. मात्र, शेवटच्या तीन सामन्यांत पराभव झाल्याने दुसऱ्या स्थानी घसरले. ताज्या क्रमवारीत चेन्नई आणि बंगळूरुचे समसमान गुण आहेत. मात्र, सरस रनरेटवर चेन्नईने अव्वल दोन संघांत स्थान राखले.
साखळी फेरीचा शेवट पराभवाने झाला तरी सांघिक कामगिरी उंचावल्याने क्वॉलिफायर-१मध्ये चेन्नईविरुद्ध दिल्लीचे पारडे जड आहे. पृथ्वी शॉ आणि शिखर धवन या ओपनर्ससह श्रेयस अय्यर, कर्णधार रिषभ पंत तसेच शिमरॉन हेटमायर आणि मार्कस स्टॉइनिसमुळे सातव्या क्रमांकापर्यंत बॅटिंग आहे. वेगवान दुकली कॅगिसो रबाडा आणि अॅन्रिच नॉर्ट्ज तसेच आर. अश्विन आणि अक्षर पटेल या फिरकी जोडीला अवेश पटेल, मार्कस स्टॉइनिसची चांगली साथ मिळाल्याने गोलंदाजीतही चिंतेची बाब नाही.
चेन्नई हा आयपीएलमधील एक यशस्वी संघ आहे. मुंबई इंडियन्सनंतर त्यांनी सर्वाधिक जेतेपदे पटकावली आहेत. सलामीवीर ऋतुराज गायकवाडने जबरदस्त फॉर्म राखला तरी गेल्या तीन सामन्यांत चेन्नईची फलंदाजी ढेपाळली आहे. गोलंदाजीतही तीच तऱ्हा आहे. पराभवाच्या हॅटट्रिकमुळे क्रिकेटपटू निश्चितच निराश झाले आहेत. निराशा झटकून स्पर्धेत परतण्याचे आव्हान चेन्नईसमोर आहे.
वेळ : सायं. ७.३०
