जोधपूर : भारताच्या लष्करी जवानांना हनी ट्रॅपमध्ये अडकवून देशातील महत्त्वाची माहिती मिळवण्याचे काम ‘आयएसआय’ या पाकिस्तानी एजन्सीच्या महिला करत आहेत. अशातच जोधपूर मिलिटरी इंजिनीअरींग सर्व्हिसचे कर्मचारी राम सिंह हे या महिलेच्या जाळ्यात अडकले. आणि सीमेपलीकडील पाकिस्तानी महिलांना देशाच्या सुरक्षेची गोपनीय माहिती पाठवण्यास सुरुवात केली. याप्रकरणी राम सिंगला अटक झाली असून त्याची चौकशी होत आहे तसेच जयपुरमधील गुप्तचर संस्थांकडून पुढील चौकशी करण्यात येणार आहे.
सुरक्षा एजन्सी एमईएसमध्ये मल्टी टास्किंग सर्व्हिसमध्ये कार्यरत असलेल्या राम सिंगवर लक्ष ठेवून आहे. गेले तीन महिने राम सिंग व्हॉट्सऍपद्वारे देशाची गोपनीय आणि धोरणात्मक माहिती सीमेपलीकडील आयएसआय या पाकिस्तानी संस्थेला पाठवत होता.
प्राथमिक चौकशीत रामसिंगच्या फोनमधून देशहितासंबंधी अनेक महत्त्वाची माहिती सुरक्षा यंत्रणेला मिळाल्याचे समोर आले. तपासादरम्यान, त्याच्या फोनमध्ये सीमेपलीकडे पाठवलेली भारतीय लष्करांच्या अनेक पत्रांची छायाचित्रे सापडली. अद्याप गुप्तचर संस्थेकडून राम सिंगचा तपास सुरू असल्याचे सुत्रांनुसार कळले आहे.